ကံခြင်းမတူရင် ဝေးရစမြဲပါ တချို့လူတွေဟာ ကိုယ့်ဘဝထဲမှာ အမြဲတမ်းရှိနေဖို့ ရောက်လာကြတာ မဟုတ်ပါဘူး။ ကိုယ့်စိတ်ကို ပိုမိုရင့်ကျက်လာစေဖို့၊ ဘဝအတွက် သင်ခန်းစာတစ်ခု ပေးခဲ့ဖို့ ခဏတာ ဖြတ်သန်းသွားလာကြသူတွေလည်း ရှိပါတယ်။ အစပိုင်းမှာတော့ လူတိုင်းဟာ ကိုယ့်အတွက် အရေးကြီးတဲ့သူတွေလို့ ထင်မှတ်မိတတ်ကြတယ်။ အမြဲတမ်း အတူရှိနေကြမယ်လို့လည်း ယုံကြည်မိတတ်ကြတယ်။ ဒါပေမဲ့ အချိန်တွေ ကြာလာတာနဲ့အမျှ လူတွေရဲ့ စိတ်နေစိတ်ထား၊ တန်ဖိုးထားတဲ့အရာတွေ၊ ရည်ရွယ်ချက်တွေနဲ့ လျှောက်လှမ်းချင်တဲ့ ဘဝလမ်းကြောင်းတွေဟာ မတူညီလာတတ်ကြတယ်။ အဲဒီအခါ အရင်လို မနီးစပ်တော့တာဟာ မေတ္တာကုန်ဆုံးသွားလို့ မဟုတ်ဘဲ အတူတူ ဆက်လျှောက်ဖို့ မသင့်တော်တော့တာလည်း ဖြစ်နိုင်ပါတယ်။ မြစ်တစ်စင်းထဲမှာ စီးဆင်းလာတဲ့ ရေတွေတောင် အကွေ့အကောက်တစ်ခု ရောက်တဲ့အခါ လမ်းကြောင်းပြောင်းပြီး ခွဲထွက်သွားတတ်ကြတယ်။ လူ့ဘဝတွေကလည်း ဒီလိုပါပဲ။ ခဏတာ ဆုံတွေ့ကြတယ်။ ခဏတာ နွေးထွေးကြတယ်။ ပြီးတဲ့အခါ တစ်ယောက်တစ်လမ်းစီ လျှောက်လှမ်းသွားကြပြန်တယ်။ လောကဓမ္မသဘာဝအရ ဆုံတွေ့ခြင်းရဲ့ နောက်ကွယ်မှာ ခွဲခွာခြင်းဆိုတာ ရှိနေပြီးသားပဲ မဟုတ်လား။ ဒီသဘောတရားကို လက်မခံနိုင်တဲ့အခါ လူတွေဟာ နာကျင်ကြတယ်။ ဖက်တွယ်ထားချင်ကြတယ်။ မသင့်တော်တော့တဲ့ ဆက်ဆံရေးတစ်ခုကိုတောင် အတင်းအကျပ် ဆက်ထိန်းထားချင်ကြတယ်။ ဒါပေမဲ့ လက်ထဲက သဲကို ပိုပြီးဆုပ်ကိုင်လေလေ သဲတွေ ပိုပြီးလွတ်ကျလေလေ ဖြစ်သလို၊ မဖြစ်နိုင်တော့တဲ့ လူတစ်ယောက်ကို အတင်းဖက်တွယ်ထားလေလေ ကိုယ့်စိတ်ပဲ ပိုပြီးပင်ပန်းလာလေလေ ဖြစ်တတ်ပါတယ်။ သစ်ပင်တစ်ပင်ဟာ အရွက်ဟောင်းတွေ မကြွေမချင်း အရွက်သစ်တွေ ဝေဝေဆာဆာ မထွက်နိုင်သလို ဘဝမှာလည်း မသင့်တော်တော့တဲ့ ဆက်ဆံရေးတွေကို လက်လွှတ်နိုင်မှသာ ကိုယ့်စိတ်ထဲမှာ ငြိမ်းချမ်းမှုအသစ်တွေ ဝင်ရောက်လာနိုင်မှာပါ။ တချို့လူတွေ ဝေးကွာသွားတာဟာ ဆုံးရှုံးမှုတစ်ခုလို ထင်ရပေမယ့် တကယ်တမ်းမှာတော့ ကိုယ့်စိတ်ကို ပိုမိုနာကျင်ခြင်းတွေကနေ ကယ်တင်ပေးသွားတာမျိုးလည်း ဖြစ်တတ်ပါတယ်။ ဘုန်းကံချင်း မတူညီကြတဲ့သူတွေဟာ အချိန်တန်တဲ့အခါ အလိုလို ဝေးကွာသွားတတ်ကြပြီး ဘုန်းကံတူညီတဲ့သူတွေကတော့ ဘယ်လောက်ပဲ ဝေးကွာနေပါစေ တစ်နေ့နေ့မှာ ပြန်လည်ဆုံတွေ့ခွင့် ရလာတတ်ကြပါတယ်။ ဒါကြောင့် ကိုယ့်ဘဝထဲက ထွက်ခွာသွားတဲ့သူတိုင်းကို မုန်းတီးနေဖို့ မလိုပါဘူး။ တချို့လူတွေဟာ ကိုယ့်ဘဝထဲမှာ အမြဲရှိနေဖို့ ရောက်လာကြတာ မဟုတ်ဘဲ ကိုယ့်ကို သင်ခန်းစာတစ်ခုခု ပေးခဲ့ဖို့သာ ရောက်လာခဲ့ကြတာပါ။ နောက်ဆုံးမှာတော့ နားလည်လာရမှာက လူတစ်ယောက်ကို ဆုံးရှုံးလိုက်ရတာထက် ကိုယ့်ရဲ့ စိတ်အေးချမ်းမှုကို ပြန်လည်ရရှိလိုက်တာက ပိုပြီးတန်ဖိုးရှိတယ်ဆိုတဲ့ အမှန်တရားပါပဲ။ ချစ်ခြင်းများစွာဖြင့်။ "ကံမတူရင် ကြာကြာမဆုံပါဘူ နျင်းဆီ #ဘဝအမှန်တရား နှင်းဆီ စာပေ - @naw..ban