@faresalznaty: فيه ناس اول ما تشوفها تحس إنك قدام حكايه جميله، وده بالظبط اللي حصل مع الحاج عوض الفردي في أولى حلقات «دولة التلاوة».. ❤️ الحاج عوض عنده 91 سنة، وعاش مع القرآن الكريم حوالي 80 سنة، بدأ رحلته معاه وهو طفل عنده 6 سنين. وظهر في البرنامج بعفوية وطيبة قلب تخليك تحبه من أول لحظة وخصوصا لما قال للجنة التحكيم إنه بقاله يومين ما نامش من القلق. الكلام ده لمس قلب الدكتور أسامة الأزهري، اللي استأذن اللجنة إنه يكسر القواعد ويقوم يقف جنب الحاج عوض، ومسك إيده وقاله قد ايه هو فرحان إنه شافه، وفضل يطبطب عليه ويبوس راسه وإيده بكل حب وتقدير. والشيخ حسن النعماني أشاد بتلاوته، وقاله إن عنده شوية ملاحظات بسيطة في بعض الحروف، والشيخ طه النعماني فاجأ الموجودين لما حكى إن الحاج عوض شارك قبلها في تحدي لتسميع فهرس المصحف الشريف كامل، وكان أسرع واحد وسط طفل وشاب! أما الشيخ مصطفى حسني فكان متأثر جدًا، ومقدرش يخبي مشاعره، وقاله إنه من ساعة ما شافه وهو مش شايف غير أنوار النبي ﷺ، وإنه حاسس إنه بعيد جدًا عن مقامه، وطلب منه يدعيله. بصراحة، المشهد كله كان مليان حب وتقدير وتواضع.. والجميل إن الحاج عوض ما دخلش ينافس على لقب وبس، ده دخل وخلّى لجنة التحكيم والجمهور كلهم يتعلموا منه درس فى التواضع❤️ #قرآن #الشيخ_عوض_الفردي #قران_كريم #ياسر_الدوسري #دولة_التلاوة

@faresalznaty

Open In TikTok:

Region: EG

Saturday 14 November 2026 10:23:56 GMT