@xeber.axini: Fövqəladə Hallar Nazirliyi (FHN) noyabrın 15-dən etibarən ölkə ərazisində gözlənilən qeyri-sabit hava şəraiti ilə əlaqədar əhaliyə müraciət edib. Xəbəraxını xəbər verir ki, nazirliyin məlumatına görə, noyabrın 15-i günün ikinci yarısından başlayaraq 16-sı axşamadək Bakıda və Abşeron yarımadası da daxil olmaqla, respublikanın müxtəlif ərazilərində hava şəraitinin qeyri-sabit keçəcəyi proqnozlaşdırılır. Bildirilib ki, güclü külək əsəcək, bəzi ərazilərdə intensiv yağış yağacaq, dağ çaylarından qısamüddətli sel və daşqın keçəcək, şimşək çaxacaq. FHN gözlənilən hava şəraiti ilə əlaqədar əhaliyə bir sıra təhlükəsizlik qaydalarına əməl etməyi tövsiyə edib. Qeyd olunub ki, güclü külək zamanı yüngül konstruksiyalı və müvəqqəti tikililərdən, binalardan və reklam lövhələrindən uzaq durmaq, elektrik dirəklərinin, naqillərin və hündür ağacların altında dayanmamaq lazımdır. Küləkli havada yanğın təhlükəsizliyi qaydalarına da xüsusi diqqət yetirilməlidir. Kiçikhəcmli gəmi istifadəçilərinə isə belə hava şəraitində dənizə çıxmağın qadağan olduğu xatırladılıb. Nazirlik intensiv yağışlar nəticəsində yarana biləcək sel, daşqın və subasma təhlükəsinə qarşı da xəbərdarlıq edib. Əhaliyə təhlükəli ərazilərdən uzaq durmaq, belə vəziyyətlə qarşılaşdıqda dərhal yaxınlıqdakı yüksəkliyə qalxmaq və xilasedicilərin göstərişlərinə əməl etmək tövsiyə olunub. Bundan başqa, ildırım çaxarkən elektrik cihazlarının şəbəkədən ayrılması, telefon danışıqlarından çəkinilməsi, açıq ərazidə elektrik xətlərindən, ildırımötürücülərdən, navalçalardan və antenalardan uzaq dayanılması vacibdir. Həmçinin hündür ağacların altında daldalanmaq olmaz. FHN avtomobildə olan şəxslərə isə hərəkəti dayandırmağı, şüşələri qaldıraraq ildırım təhlükəsi sovuşanadək nəqliyyat vasitəsində gözləməyi tövsiyə edib. #azərbaycan #xeber #ensonxeberler #fhn

Xeber Axini

Open In TikTok:

Region: AZ

Saturday 14 November 2026 10:26:38 GMT