@hamzawrites178: مرد کی پیدائش پر خوشیاں منائی جاتی ہیں، اسے خاندان کا وارث کہا جاتا ہے، اس کے آنے پر مٹھائیاں تقسیم ہوتی ہیں، لیکن شاید ہی کوئی اس بات کو سمجھتا ہے کہ اس بچے کے حصے میں آنے والی زندگی کتنی ذمہ داریوں سے بھری ہوگی۔ بچپن میں اسے سکھایا جاتا ہے کہ تم نے بڑا ہو کر گھر کا سہارا بننا ہے، ماں باپ کی امیدیں پوری کرنی ہیں، بہنوں کا خیال رکھنا ہے اور خاندان کی عزت کا خیال رکھنا ہے۔ وہ عمر کے ساتھ بڑا ہوتا ہے تو اس کی خواہشات، خواب اور ذاتی ضروریات کہیں پیچھے رہ جاتی ہیں۔ کبھی ماں کی دوائیوں کے لیے اپنی ضرورتیں قربان کرتا ہے، کبھی بہن کی شادی اور جہیز کے لیے اپنی جمع پونجی خرچ کر دیتا ہے، کبھی بیوی کی خواہشات پوری کرنے کے لیے اپنی پسند بھول جاتا ہے اور پھر جب بیٹی پیدا ہوتی ہے تو اس کی تعلیم، تربیت، خوشیوں اور محفوظ مستقبل کے لیے اپنی پوری زندگی لگا دیتا ہے۔ وہ خود کتنی ہی مشکلات میں کیوں نہ ہو، کوشش کرتا ہے کہ اس کے گھر کی عورتوں کو کسی چیز کی کمی محسوس نہ ہو۔ کبھی اپنی تھکن کا ذکر نہیں کرتا، کبھی اپنے مالی مسائل کسی کو نہیں بتاتا اور کبھی اپنی ادھوری خواہشوں کا حساب نہیں مانگتا۔ لوگ اکثر کہتے ہیں کہ مرد روتے نہیں، لیکن کوئی یہ نہیں پوچھتا کہ وہ اپنے آنسو کہاں لے کر جاتا ہے؟ اسے بھی کبھی کسی کے کندھے کی ضرورت ہوتی ہے، اسے بھی کبھی یہ سننے کا دل چاہتا ہے کہ تم تھک گئے ہو تو کچھ دیر آرام کر لو، ہر ذمہ داری صرف تمہاری نہیں ہے۔ اسے بھی اچھے کپڑے پہننے، اپنی پسند کی چیز خریدنے، دوستوں کے ساتھ وقت گزارنے اور اپنے لیے زندگی کے چند خوبصورت لمحے جمع کرنے کا حق ہے۔ مگر ہمارے معاشرے میں اکثر مرد کی قدر اس کی کمائی اور ذمہ داریاں پوری کرنے کی صلاحیت سے کی جاتی ہے۔ جب تک وہ سب کی ضرورتیں پوری کرتا رہے، وہ اچھا بیٹا، اچھا بھائی، اچھا شوہر اور اچھا باپ ہوتا ہے، لیکن جس دن حالات کی وجہ سے اس کے ہاتھ تنگ ہو جائیں، اسی دن اس کی محنت اور قربانیاں بھی بعض لوگوں کو یاد نہیں رہتیں۔ یہ بھی حقیقت ہے کہ عورتیں بھی اپنی زندگی میں بےشمار قربانیاں دیتی ہیں، لیکن مرد کی خاموش جدوجہد کو بھی نظرانداز نہیں کرنا چاہیے۔ آخر وہ بھی انسان ہے، کوئی مشین نہیں جسے صرف ذمہ داریاں اٹھانے کے لیے پیدا کیا گیا ہو۔ ماں کے لیے وہ بیٹا ہے، بہن کے لیے بھائی، بیوی کے لیے شوہر اور بیٹی کے لیے دنیا کا سب سے مضبوط سہارا، مگر ان سب رشتوں کے درمیان کہیں ایک شخص ایسا بھی ہے جس کا نام مرد ہے، جس کے اپنے خواب ہیں، اپنی خواہشیں ہیں اور جسے کبھی کبھی صرف محبت، احترام اور تھوڑے سے سکون کی ضرورت ہوتی ہے۔ اس لیے مرد کی صرف کمائی نہیں، اس کی محنت، اس کی تھکن، اس کی خاموشی اور اس کی قربانیوں کی بھی قدر کیجیے، کیونکہ گھر کی ذمہ داریاں اٹھانے والے اس شخص کو بھی کبھی یہ احساس دلانے کی ضرورت ہوتی ہے کہ وہ صرف کمانے کے لیے نہیں، محبت کیے جانے کے لیے بھی اہم ہے۔ ❤️ #foryoure #viralvideos #foryoupage #followers #everyone
