@azpolitika: Müəllimdən utancaq şagirdinə unudulmaz sürpriz – Sinif yoldaşları onu alqışladı Bəzən kiçik bir jest uşağın yaddaşında uzun müddət qalacaq xoş xatirəyə çevrilə bilər. Sosial şəbəkələrin Türkiyə seqmentində yayılan video izləyicilərin diqqətini çəkib. “Ali Ejder və öğrencileri” səhifəsində paylaşılan görüntülərdə müəllimin sinifin utancaq, sakit şagirdlərindən birinə xüsusi sevinc yaşatdığı görünür. Müəllimin qarşısına çıxardığı kartlardan “ev tapşırığı yoxdur” yazılanı seçən şagirdin sevincinə sinif yoldaşları da biganə qalmır. Onlar ayağa qalxaraq dostlarını alqışlayır, ətrafına toplaşaraq onu qucaqlayırlar. Beləliklə, adətən sakitliyi ilə seçilən şagird bir anda sinfin ən sevincli və diqqət mərkəzində olan qəhrəmanına çevrilir. Video sosial şəbəkə istifadəçilərinin də rəğbətini qazanıb. İzləyicilər müəllimin bu davranışını yüksək qiymətləndirərək ona təşəkkür edib, “Halal olsun” kimi rəylər yazıblar. Bəzən bir uşağın özünü dəyərli, sevilən və sinfin bir parçası hiss etməsi üçün böyük işlər görməyə ehtiyac yoxdur. Kiçik bir diqqət kifayətdir.
