@ramialtalib: أكو فرق كبير بين إنك تشجع منتخب دولة ثانية وتحبه وتحترم لاعبيه، وبين إنك تشجعه على حساب منتخب بلدك! الموضوع مو متعلق بإيران ولا بأي دولة ثانية، ولا عندي مشكلة ويا أي شخص يحب المنتخب الإيراني أو يشجعه بالمباريات والبطولات الأخرى، هذا حقه وقناعته الشخصية، لكن من توصل الأمور إلى مباراة تجمع منتخب بلدك بمنتخب ثاني، وتختار تشجع المنتخب المنافس ضد بلدك، هنا لازم نوقف ونسأل: شنو معنى الانتماء إذا حتى بملعب كرة القدم ما نكدر نوقف ويا منتخبنا؟ اللي صار بمباراة العراق وإيران بالبصرة بالنسبة إلي مشهد مؤسف، لأن الجمهور العراقي المفروض يكون السند الأول لمنتخبه، خصوصاً وهو يلعب على أرضه وبين جماهيره. وأريد أوضح نقطة مهمة: اختلافي ويا هذا التصرف مو معناه أدعو للعنصرية أو الكراهية أو التفرقة بين الشعوب. بالعكس، أحترم كل الشعوب وأتمنى الخير للجميع، وما عندي أي مشكلة ويا الشعب الإيراني أو أي شعب آخر. لكن حبك لشعب أو إعجابك بمنتخب ما، ما لازم يخليك تتخلى عن منتخب بلدك بالمواجهة المباشرة. شجع اللي تريده، أحب اللاعب اللي يعجبك، وتابع أي دوري وأي منتخب بالعالم، لكن من يجي منتخب بلدك يلعب، لا تخلي انتماءك بمكان ثاني. الاختلاف بالرأي حق، لكن بالنسبة إلي تشجيع المنافس ضد منتخب بلدك مو مجرد اختلاف بالتشجيع، وإنما موقف يحتاج مراجعة. #iraq #iran #العراق #ايران #المنتخب_العراقي