कौशल चौधरी :
हामी नेपालीहरू पनि कति अचम्मका छौँ! हरेक पटक भगवान् भरोसा गर्छौँ। ‘हे भगवान्, हाम्रो टिमलाई जिताइदेऊ, हाम्रा खेलाडीलाई राम्रो प्रदर्शन गर्ने शक्ति देऊ’ भनेर प्रार्थना गर्छौँ। तर प्रश्न भगवान्सँग होइन, हाम्रा खेलाडीहरूको प्रदर्शन, अनुशासन र जिम्मेवारीसँग हो।
तपाईंहरू मान्नुस् या नमान्नुस्, मलाई गाली गर्नुस् या जे भन्नुस्, तर आजको प्रदर्शनले गम्भीर प्रश्न खडा गरेको छ।
लोकेश बम, सन्दीप लामिछाने, बसिर अहमद, हाम्रो प्यारो भाइ अर्जुन कुमाल, कुशल भुर्तेललगायत खेलाडीहरूबाट हामीले धेरै अपेक्षा गरेका छौँ। तर केही राम्रो सट हान्दैमा आफूभन्दा ठूलो कोही छैन भन्ने घमण्ड देखाउनु हुँदैन। क्रिकेटमा प्रतिभासँगै धैर्यता, आत्मविश्वास, अनुशासन र जिम्मेवारी पनि उत्तिकै आवश्यक हुन्छ।
त्यसैले म नेपाल क्रिकेट संघ (CAN) का सम्पूर्ण पदाधिकारीज्यूहरूलाई विनम्र अनुरोध गर्न चाहन्छु—आजको लज्जास्पद प्रदर्शनलाई सामान्य हार भनेर नछोड्नुहोस्। खेलाडीहरूको प्रदर्शनको गम्भीर समीक्षा गर्नुहोस् र आवश्यक कदम चाल्नुहोस्।
३३३ रनको लक्ष्य पछ्याउँदा जम्मा २६ रनमै अलआउट हुनु भनेको सामान्य हार होइन, नेपाली क्रिकेटका लागि गम्भीर आत्मसमीक्षाको विषय हो।
हामीलाई खेलाडीहरूसँग व्यक्तिगत रिस छैन। हामी त नेपाली क्रिकेटको भविष्य राम्रो होस् भन्ने चाहन्छौँ। देशको जर्सी लगाएर मैदानमा उत्रिएपछि खेलाडीले आफ्नो नाम मात्र होइन, सिंगो नेपालको इज्जत बोकेको हुन्छ।
हामीलाई भगवान् भरोसाको क्रिकेट होइन, मेहनत, अनुशासन, धैर्यता र जिम्मेवारीका साथ खेल्ने नेपाली टिम चाहिएको छ। 🇳🇵
2026-11-20 16:39:51