@dr_g.com: البائع يشوف صاحب الحاجة فرصة شلون يگدر يستغلها، إذا شوي دِرت وجهك يبدّل الخيارة والطماطة وغيرها الزينة بالرديئة، وإذا غفلت شوي يمكن يبوگك بالوزن… وإذا خابرته على سمچة وگلتله أريدها عدلة وتازة، عدنا خطار، بلك تشويها من إيدك وأجي آخذها… ينطيك السمچة الميتة البايتة للشوي! ويجيب لحم مجمّد ويموّعه ويفرمه للكباب، أو يموّع القطع الكبار المجمّدة ويبيعها بسعر لحم الذبح. وإذا عندك بناء وغفلت عنه شوي، يجيب أسوأ المواد ويشتغل شون ما جان. وإذا صار مقاول ولزم مشروع للدولة، يعتبرها فرصة أكبر… يرشي مسؤول حتى يغمّض عينه، ويمشّي الشغل شون ما جان. والغش للأسف مو بس بالسوق… حتى بالسياسة، اللي صارت عند البعض فرصة يوصل لمنصب بالدولة حتى يستفاد منه، وبالتعليم والصحة وبكل مكان. بس المصيبة الأكبر مو هنا… المصيبة أن الناس بدت تتأقلم وتتعود وتتقبل الغش، وحتى الفساد صار عند البعض شي عادي، وما عاد عيب يكون الإنسان فاسد أو مرابي أو حرامي! جانت الناس تضحي بنفسها حتى تحفظ الأمانة… هسه شنو اللي صار ؟! ليش نخاف من كامرات الناس، وما نخاف من كامرة رب العالمين؟!