@nirmala_271205: #சுத்தாத்வைத_சைவசித்தாந்தம் இன்பதனை எய்துவார்க் கீயும் அவற்குருவம் இன்பகன மாதலினா லில். - சிவஸ்ரீ உமாபதி சிவம் அருளிய மெய்கண்ட சாத்திர நூலாகிய திருவருட்பயன் (73) இறைவனால் ஆன்மாவுக்கு இன்பமேயன்றி ஆன்மாவினால் இறைவனுக்கு எய்தக் கடவ இன்பம் எதுவுமில்லை என்பது இக்குறளினால் உணர்த்தப்பெற்றது.இதனால், உயிர்களுக்கு கொடுப்பதன்றி இறைவன் தானும் அவ்வின்பத்தினை நுகர்வானோ என்னுஞ் சங்கை அகற்றப்பட்டது. முத்தி நிலையில் சிவத்தை அணைந்த உயிர் பேரின்பத்தைத் துய்ப்பது போல உயிரை அணைந்த சிவமும் இன்பத்தை நுகர்தல் உண்டோ? என்ற ஐயம் எழுகிறது. அவ்வையத்தை மேற்கண்ட குறளின் மூலம் தெளிவுபடுத்துகிறார் சிவஸ்ரீ உமாபதி சிவம். "தந்ததுன் றன்னைக் கொண்டதென் றன்னைச் சங்கரா ஆர்கொலோ சதுரர் அந்தமொன் றில்லா ஆனந்தம் பெற்றேன் யாதுநீ பெற்றதொன் றென்பால் சிந்தையே கோயில் கொண்டஎம் பெருமான் திருப்பெருந் துறையுறை சிவனே எந்தையே ஈசா உடலிடங் கொண்டாய் யான்இதற் கிலன்ஓர்கைம் மாறே. " - திருவாசகம்-கோயில் திருப்பதிகம்-10 என ஸ்ரீ மணிவாசகப் பெருந்தகை தம்மை ஆட்கொண்டருளிய இறைவனை நோக்கி வினவு முறையில்(யாதுநீ பெற்றதொன் றென்பால்) அருளிய திருவாசகத்தல் நன்கு தெளியப்படும். இறைவனுக்கு நுகர்ச்சியில்லை என்பதை இரண்டு காரணங்கள் காட்டி நிறுவலாம். 1. முன்பு இல்லாதது பின்பு பெற்ற பொழுதே நுகர்ச்சி என்பது உண்டாகும். உயிரிடத்தில் இன்பம் இயற்கையாக இல்லை. இன்பத்தைத் தன்னிடம் கொண்டிராத உயிரே இறைவனைச் சார்ந்து அவனது பேரின்பத்தைப் புதிதாகப் பெற்று நுகரும். இறைவனிடத்தில் பேரின்பம் எப்போதும் நிலைபெற்று அவன் பேரின்பவடிவினன் ஆதலால், அவன் இன்பத்தைப் புதிதாகப் பெற்று நுகர்தல் இல்லை. 2. அனுபவித்தல் என்பதற்கு அழுந்தி நிற்றல் என்பது பொருளாகும். அந்த அந்தப் பொருளில்தான் அதுவேயாய் அழுந்தி நிற்றல் ஆன்மாவின் இயல்பேயாகும். இறைவன் எதிலும் தோயாது நின்று முற்றும் அறிபவன். அவன் எதனையும் அழுந்தியறியான். ஆகவே, அவனுக்கு எதிலும் நுகர்ச்சியில்லை என்பது இனிது விளங்கும். சித்தாந்த போதகாசிரியர் ஸ்ரீ ஆனந்தராசன் ஐயா அவர்கள். #omnamahshivay #omnamahshivaya #harharmahadev #anbesivam