@qaz365kz: ❗️Жетісу облысында Балқаш көлінің жағалауы жазғы туристік маусымға дайындалып жатыр. Демалушылардың қауіпсіздігі мен жайлы демалысын қамтамасыз ету үшін жағалауда ауқымды абаттандыру және инфрақұрылымды дамыту жұмыстары жүргізілуде. Қазіргі уақытта жағалауда тазалық пен қауіпсіздікке ерекше көңіл бөлінген. Осы мақсатта 130 жаңа қоқыс контейнері орнатылып, шомылу аймағына ұзындығы 1 шақырым болатын қорғаныш қойылған. Сондай-ақ демалушыларға арналған заманауи модульдік дәретханалар іске қосылды. Жетісу облысы әкімінің орынбасары Марлен Көлбаевтың айтуынша, аумағы 6 гектарды құрайтын коммуналдық жағажайдың құрылысы аяқталуға жақын. «Қазір мұнда 500 көлікке арналған автотұрақ, фудкорт аймағы салынып жатыр. Сонымен қатар полиция, төтенше жағдайлар қызметі мен медицина мамандарына арналған бөлмелер, ана мен бала бөлмесі және әкімшілік кабинеттері қарастырылған. Жағажайда көлеңкелік орындар мен барлық қажетті инфрақұрылым болады. Бұл жер бір мезетте 3 мың адамды қабылдай алады. Жобаны осы шілде айында аяқтауды жоспарлап отырмыз», – деді ол. Облыс әкімдігі Балқаш жағалауын дамытудың бас жоспары аясында үш коммуналдық жағажай салуды жоспарлап отыр. Соның бірі – «Балдәурен» жағажайы. Аумағы 14 гектарды құрайтын бұл аймақ балалар мен отбасылық демалысқа арналған. Мұнда ойын алаңдары, қауіпсіздік жүйесі және барлық қажетті жағдай жасалады. Құрылысы шілде айында басталып, күзде аяқталады. Ал күзде аумағы 7 гектар болатын «Этно» жағажайының құрылысы басталады. Аталмыш демалыс аймағында Қазақстандағы түрлі этностардың мәдениеті мен дәстүрін таныстыратын ерекше туристік кеңістік қалыптастыру көзделген. Балқаш жағалауында инженерлік инфрақұрылым да толық жаңартылып жатыр. Жағалауға дейін автомобиль жолы, электр желісі, орталықтандырылған су құбыры және кәріз жүйесі тартылған. Осылайша, жаңа демалыс орындары инженерлік желілерге қосылады.

Qaz365.kz | Новости Казахстана

Open In TikTok:

Region: KZ

Wednesday 01 July 2026 09:51:48 GMT