ሬይ ሉካስ ወደ ሚንበለበለው እሳት ውስጥ ያለማመንታት ዘሎ ገባ ። ለእሱ በዛች አስፈሪ ሰዓት ምንም ዓይነት አማራጭ አልነበረውም፤ ምክንያቱም በሚቃጠለው ቤት ውስጥ 18 ወር መንታ ልጆቹ ነበሩ። ሐምሌ 17፣ 2021 በአሜሪካ፣ ሚቺጋን ግዛት ። ሬይ ሉካስ የተባለ ወጣት አባትና ባለቤቱ ሺአን ብራውን ለልጆቻቸው ወተት ለመግዛት ከቤት ይወጣሉ። ከጥቂት ደቂቃዎች በኃላም ወደ ቤት ይመለሳሉ። ሁለቱ ጥንዶች ወደ ቤታቸው ሲመለሱ የጠበቃቸው ነገር ለማመን የሚከብድ ነበር ። መኖሪያ ቤታቸው በጥቁር ጭስ ተሸፍኖ፣ በሚንቀለቀል እሳት ተያይዟል ። ሁለቱም በአይኖቻቸው የሚያዩትን ለማመን ቸገራቸው ፤ በተለይ ሬይ ሰማይና ምድር ዞረበት፤ ነገር ግን ለመደንገጥና ለማለቀስ እንኳ ጊዜ አልነበረውም። ምክንያቱም የ18 ወር መንታ ልጆቻቸው ማላያ እና ሚላን እሳቱ መሃል ተዘግቶባቸዋል ። የእሳት አደጋ ሰራተኞች እስኪደርሱ መጠበቅ ማለት ልጆቹን ለዘላለም ማጣት እንደሆነ ገባው ። ወጣቱ አባት አፍታም ሳያመነታ፣ ስለራሱ ሕይወት ቅንጣት ታክል ሳያስብ፣ በቀጥታ ወደሚንቀለቀለው እሳት እና ወደሚያፍነው ጥቁር ጭስ ዘሎ ገባ። ቤቱን በደንብ ስለሚያውቀው በፍጥነት ወደ ምድር ቤት አመራ። በጭሱ ብዛት አይኑ ምንም ማየት አልቻለም። ትንፋሽ ያጥራል። ነገር ግን የአባትነት ስሜትና የልብ ትርታው እየመራው በእጁ እየዳሰሰ ልጆቹን መፈለግ ጀመረ። የ18 ወር ህጻናቶቹ ከድንጋጤና ከጭሱ መታፈን የተነሳ ድምፃቸውን አጥፍተው ዝም ብለው ነበር። "በዳሰሳ ስፈልግ ሁለቱንም አገኘኋቸው... በህይወት መኖራቸውና ምላሽ መስጠታቸው በዛች የሞት ሰዓት ውስጥ ትልቅ ተስፋ ሰጠኝ" ይላል ሬይ። ሁለቱንም ጨቅላ ልጆቹን ደረቱ ላይ አቅፎ፣ እሳቱን እየተጋፋ፣ ህይወቱን ለሞት አሳልፎ ሰጥቶ ከቤቱ ይዟቸው ወጣ። ልጆቹን ለእናታቸው ከሰጠ በኋላ ግን ይህ ጀግና አባት አላረፈም። የእህቱ ልጅ በሁለተኛው ፎቅ ላይ እንዳለች ትዝ አለው። እንደገና ወደ እሳቱ ገባ፣ ነገር ግን ጭሱ ወደ ላይ መውጣት የማያስችል ደረጃ ደርሶ ነበር። ተስፋ ሳይቆርጥ ወደ ኋላ ግቢ ሮጦ በመሄድ ከሁለተኛው ፎቅ መስኮት እንድትዘል ነገራት። በባዶ እጆቹም ተቀበላት! አዎ፣ ሌላ ህይወት አተረፈ። በዚህ የጀግንነት ተግባሩ ሬይ በክንዱ፣ በሁለቱም ጆሮዎቹ፣ በቀኝ ፊቱ እና በአንገቱ ላይ ከፍተኛ የሆነ የሁለተኛ እና ሶስተኛ ደረጃ ቃጠሎ ደርሶበታል። በጭስ መመረዝ ምክንያት የዓይን ቀንድ አውጣው (Corneas) ክፉኛ ስላበጠ ለሶስት ቀናት ሙሉ ማየት አቅቶት ነበር። ዶክተሮች "እይታው ላይመለስ ይችላል" ብለው ፈርተው ነበር (አሁን እይታው ተመልሷል)። ትንንሾቹ መንታ ልጆችም ከባድ ቃጠሎ ደርሶባቸዋል። ሚላን በእግሮቿና በጀርባዋ፣ ማላያ ደግሞ በጉንጯና በእጆቿ ላይ ጉዳት አስተናግደው አባትና ልጆች ለ5 ቀናት በከፍተኛ የሕክምና ክፍል (ICU) ውስጥ ሞትን ታግለዋል። ከሆስፒታል ሲወጡ ቤታቸው እና ንብረታቸው ሙሉ በሙሉ ወድሟል። ውድ የሆነ የሕክምና ወጪም ተደራርቦባቸዋል። ነገር ግን ይህን የእውነተኛ አባት የጀግንነት ስራ የሰማው ማህበረሰብ ዝም አላለም።አክስታቸው የህክምና ወጪ ለመሸፈን በማሰብ የGoFundMe (የገንዘብ ማሰባሰቢያ) ከፍታ 40,000 ዶላር ለማግኘት አቅዳ ነበር። ነገር ግን የሬይ መስዋዕትነት ልባቸውን የነካው ከ8,000 በላይ ደግ አድራጊ ሰዎች በአጭር ጊዜ ውስጥ ከ286,000 ዶላር በላይ አሰባስበውለታል። ወጣቱ አባት ሬይ የፈጸመው ጀብድ ፤ሁልጊዜ ጀግንነት ጡንቻንና አካላዊ ጥንካሬን ማሳየት ብቻ አለመሆኑን አሳይቷል ። ጀግንነት ማለት ተስፋ መቁረጥን እምቢ ያለ ጥልቅ ፍቅር፣ እና ለሚወዱት ሰው ሲሉ የሚከፈል ማለቂያ የሌለው መስዋዕትነት ነው።አንድ አባት ለልጆቹ ሲል ሁሉንም ነገር አደጋ ላይ ጣለ... ማህበረሰቡ ደግሞ ለዚህ አባት "አለንልህ" አለው። እውነተኛ ጀግንነት እና የሰው ልጅ መተሳሰብ ማለት ይሄው ነው። ሰላም ፍቅር ጤና ለሀገራችን !❤️🙏 #maleda #ጥቁር_ሰው_ሚዲያ - @abebayehuassefatkursew