"Handhuurri koo Lixa Biiftuu dachee Wallaggaa irratti awwaalamte, Yeroon Lubbuun darbe immoo Magaalaa Ambootti na awwaalaa" kan jette falmattuu fi Qabsooftuu Mirga dhala Namaa kan taate Artist Ilfinash Qannooti. Artist Ilfinash Qannoo Qabsooftuu gameettii dhiirummaan saalaan qofa akka hin taane mirkaneessite, Nama dubartummaan ishee Dirree qabsoo hin dhorkine, kan seenaa qabsoo Oromoo keessatti Umurii ishee guutuu saba ishee hacuuccaa, cunqursaa fi gita-bittaa alagaa jalaa baasuuf dhaaba Adda Bilisummaa Oromoo jalatti hiriiruun Aartii sirbaatiin sagalee Bilisummaa ta'uu bira darbitee hanga qaamaan Dirree lolaa deemtee WBO sagaleen jajjabeessituutii hanga loltee lolchisuutti aarsaa gita hin qabne Nama kanfalaa turte jaalatamtuu Namaati. Namoota Oromummaa isaaniif aarsaa kanfalan keessaa Art. Ilfinash qabsooftuu Qaruuraa caccabaan mataa goggogaan irraa aadamee fi shammarran Oromoof akkasumas dhiirotaaf illee guca qabsoo fi fakkeenya taatee jirti. Yeroo mara Tokkummaa Uummata Oromoo waan leelliftuuf gootummaa fi jaalatamummaan Art. Ilfinash Qannoo dhaaba qabsoo akkasumas kutaaf amantiin kan hin daangeffamnee fi Onnee Uummata Oromoo maraa keessa jirudha. Miidiyaalee gurguddaa Biyyattii dabalee Qabsaa'onni Oromoo akkasumas Aangaa'onni Oromoo hedduun gadda isaanii ibsachaa kan jiran yoo ta'u Dhaloonni Ilfee Naqamtee ta'us akkuma Isheen gaafa Lubbuun jirtu Ambotti na awwaalaa jettee himattee turte Sirni awwaalchaa isaanii Magaalaa Ambootti akka geggeeffamu Aartistoonni fi qabsaa'onni Oromoo ibsa Miidiyaaleedhaaf kennaniiru. Sababiin isheen Ambootti na awwaalaa jettee turteefis Uummanni Amboo yeroo isheen Karchallee Ambootti sirna Wayyaaneen dararamaa turte deeggarsa walirraa hin cinne gochaafi waan turaniif yoo ta'u Uummata Ambootti dabaluun Uummata Arsiis galateeffattee turte. Abeebee Koluu Miidiyaa. - @abeebeekoluumedia