جانت فاطمه گاعدة بالصالة هي والبنات وملاك ورهف اختها ورهف بنت مصطفى لابسات احجبه وواگفات على السجادة. فاطمه:يلا يلا بدون ضحك،گولن اعوذ بالله من الشيطان الرجيم بسم الله الرحمن الرحيم! يكررن البنات الصغار ورا فاطمه ويباوعن على التربة وفاطمه مكمله تحجي وهن يحجن وراها،رحت وگعدت يمهن وباوعت لـ فرح. -شكو؟ -نريد نعلمهن الصلاة،اليوم فاطمه مُصرة تعلمهن. ابتسمت واباوع للبنات ورهف اخت فاطمه دارت وجهها لـ ملاك وضحكت وزينب عاطت بيها. -ولجج انگطعت الصلاةة يبو!لاتدورين راسج! رهف ورجعت واگفه وشكلها لطيف وهي تحاول تستقيم وجمدت مثل الصنم مثبته روحها وتقرأ ورا فاطمة. فاطمة:يلا اركعن وگولن سبحان ربي العظيم وبحمده،ربي صل على محمد وآل محمد. ركعت ملاك ورهف ورهف الصغيرة سجدت بدون ركوع وزينب گامت گبالها وشالتها وتعيط. -ولجج ركوععع ركوععع!تسجدينن مستعجلهه! متنا من الضحك ورهف تضحك وزينب باستها ووگفت گبالها تركع. -هذا ركوع،والسجود تحطين راسج على التربة خوش؟يلا اركعي. رهف سجدت وتعاند وتضحك وي زينب،وفاطمه تضحك وسحبتها تبوسها وتحضنها وزينب راحت جابت الشاحنه وطبگتها وتباوع لـ رهف. -اليوم اضربج اگطعج! صارت تحاول تضربها بالشقة وكلنا نضحك ورهف تحتمي بـ فاطمه وتضحك. … فاطمه:- ٢٠٢١/٨/٩ الايام الي راحت مرت بهدوء تام…نگعد ناكل وننام ونسولف،هذا الروتين طول هاي الايام،العمام كلهم الايام الي فاتت يقرأ عليهم الرجال… وخلينا القرأن مفتوح بالبيت ٢٤ ساعه لحد ماتشافوا من السحر،رجعوا لربهم ولصلاتهم ولأذكارهم،رجعوا العمام الحنونين اليحبونا كلنا. بهذا اليوم گاعدة وامشط شعر رهف وسويت إلها گصيبتين حلوات…لبستها ملابس مرتبه كالعادة وهي تدندن وتباوع حول الغرفة،تمد ايدها على المكياج وتستكشف… لمحت صبغ الأظافر واخذته تأشرلي صبغيلي،صبغت اظافرها واني احجي وياها. -تدرين اني شگد احبج؟احبج كلش هواي وماارضى اي أحد يحاجيج! اليحاجيج ويضوجج بس تعاي گليلي إلا اموته كتل! ابتسمت وهي تباوع لأظافرها. -وتدرين انتِ كلش حلوة؟انتِ مفروض يخلونج ملكة جمال! خجلت وتضحك بخجل واني مبتسمه وبقيت امدحها واتغزل بيها واگوللها كلام تستحق ينگال الها. كملت ولزمت اصابيعها وانفخ على اظافرها ومن كملت باست خدي وحضنتني بقوة وبخبال،واني اضحك. راحت يم الباب تگمز حتى ننزل وتهز بخبال وبوكاحه…ابتسمت وفتحت الباب ونزلنا اني وياها واللزم ايدها واحنا ننزل الدرج واشيلها وهي تضحك. وصلت لجوا وراحت ركض لـ محمد،شالها وبوسها وحطاها بحضنه يتغزل بأظافرها وشعرها. من شبعت غزل من محمد نزلت وراحت گدام عمتي حنان وتصيح. -بيبي سوفي(شوفي)بيبي! باوعتلها حنان ورهف صارت تهز واحنا ميتين من الضحك… تأملت فرحتها والضحكة الي ما فارگت وجهها،وعمتي حنان جرتها الحضنها وظلت تبوس بخدودها وتدغدغها ورهف تصيح وتضحك. جانت الحركة والركض مالتها،وهزها وضحكها بدون أي خوف أو مستحة،وراها سر جبير… رهف عاشت أيام صعبة يم خالها،مجانت تلعب ولا تلگه اهتمام هيج عند خالها. بس هنا…بين عائلة زوجي،لگت الأمان الي جانت تفتقده. هذول الناس ما جانوا مجرد اهل زوجة اختها! جانوا السند والملجأ،السبب الي مخلي رهف تاخذ راحتها وتتصرف بعفوية ووكاحة وي أهل محمد هو الحب غير المشروط الي غرگوها بي من أول يوم اجت لـ هنا وخاصة عمتي حنان، ما عاملتها بيوم على أنها غريبة ابدًا وجانت تشيلها وتداريها مثل بناتها وأكثر،ومحمد جان إلها مثل الأب الحنون الي يحميها ويحطها بعيونه. رهف جانت تحس بگلبها النقي إن هذا البيت هو المساحة الآمنة مالتها،المساحة الي تگدر تكون بيها على طبيعتها،تگمز،تضحك،وتتدلل وتدلع وتتخبل بدون ما تخاف من نظرة حكم او كلمة او شخص يصيح عليها ويگعدها او يگطع فرحتها! گعدت عمتي حنان تلعب وي رهف وتسولف ووياها وتدغدغها وتحضنها وكلنا التفتنا على مرتظى وهو صار يحجي. -منتظر عمي،ماهر مالگيته اثر؟ -ماكو لا هو ولا اخوانه…رحت لـ بيت ميرية گالت انگطعت علاقتي بيهم وبيكم وكلشي بيناتنا انتهى واني مااعرف هم وين ورقمه مغيرة. زينب:اني حاسة بشعور مو حلو،يعني شعجب من هدد اختفى؟ شعجب من طلبت الطلاگ منه اختفى؟ ناصر:ارتاحي عمو ماراح يصيرلج شي دامنا وياج…وهذا الهتلي نلزمة نلزمة. -باجر ابوي يطلع وبس يرجع لعقله اگله يطلع عمار من السجن…شنو ردة فعله اذا طلع وعرفني متزوجة؟اريد اتطلك قبل لا يطلع عمار! مصطفى:تطلگين عمو تطلگين. بقت ساكتة وماجاوبته وثواني ورجعت تباوع لـ منتظر. -بس تلزمه كلهم تذبهم بالسجن!گتلك شسووا بيه وامه شصخمت بيه وحتى هو كسرني! وحتى هذا الي بالنجف تشيلوهم!شنو دجل وشعوذة وفوگاها يطلب شغلات طايح حظها! منتظر:يابة وعيونج كلهم يتحاسبون على افعالهم. بقوا يحجون فترة طويلة ومر هذا اليوم على خير… ثاني يوم گعدنا من وكت،والكل فرحان لأن عمي فراس راح يطلع من السجن اليوم ويرجع للبيت… نظفنا البيت وعمتي حنان طبختله الاكل اليحبه والبنات كل شوية يروحن يم الباب ويباوعن للفرع… .. - @fmzh41