वास्तवमा, पारिजातको फूल नै त्यो मुख्य कडी हो, जसका कारण देवराज इन्द्र स्वर्गबाट काठमाडौँ उपत्यका ओर्लिनु परेको थियो र अन्ततः इन्द्रजात्रा पर्व शुरु भयो। पौराणिक कथा अनुसार ः देवराज इन्द्रकी आमा बसुन्धरा भाद्र शुक्ल अष्टमीका दिन एक विशेष व्रत वा पूजा अनुष्ठान गर्दै थिइन्। उक्त पूजा सम्पन्न गर्नका लागि अत्यन्त सुगन्धित सेतो रङको पारिजात फूल अनिवार्य रूपमा आवश्यक थियो, जुन त्यस समयमा स्वर्गलोकमा उपलब्ध थिएन। आफ्नी आमाको पूजाका लागि फूल खोज्दै इन्द्र बादलको ओढ्ने ओढेर मानिसको भेषमा काठमाडौँ उपत्यका ओर्लिए। उनले काठमाडौँको मरुटोल नजिकैको एउटा बगैँचामा सुन्दर पारिजातको फूल फेला पारे र कसैलाई नसोधीकन फूल टिप्न थाले। बगैँचाका मालिकले उनलाई फूल चोरिरहेको अवस्थामा रङ्गेहात भेट्टाए र 'चोर' ठानी नियन्त्रणमा लिए। स्थानीयबासीहरूले इन्द्रको वास्तविक पहिचान थाहा नपाएकाले उनलाई सजायस्वरूप हातखुट्टा बाँधेर सहरको बीच चोकमा सबैले देख्ने गरी प्रदर्शनमा राखे। आज पनि इन्द्रजात्राको समयमा काठमाडौँको मरुटोल र विभिन्न चोकहरूमा हात बाँधिएका इन्द्रको मूर्ति (यमाःद्यः) लाई खटमा राखेर प्रदर्शन गर्ने परम्परा यही घटनाको जीवन्त सम्झना हो। छोरा लामो समयसम्म स्वर्ग नफर्किएपछि चिन्तित भएकी आमा बसुन्धरा कुहिरोको रूप धारण गरेर काठमाडौँ आइन् र स्थानीयहरूलाई आफ्नो छोरा 'देवराज इन्द्र' भएको जानकारी गराइन्। आफ्नो गल्ती महसुस गरेपछि काठमाडौँबासीले इन्द्रलाई ससम्मान बन्धनमुक्त गरे। यसको बदलामा इन्द्र र उनकी आमाले काठमाडौँ उपत्यकामा खेतीपातीका लागि पर्याप्त कुहिरो, शीत र समयमा वर्षा गराइदिने र बितेका पितृहरूलाई स्वर्ग लैजाने वाचा गरे। त्यही सम्झनामा यो जात्रा मनाउन थालिएको विश्वास गरिन्छ। यसरी पारिजातको फूल टिप्ने एउटा सानो घटना नै काठमाडौँ उपत्यकाको सबैभन्दा ठूलो सांस्कृतिक उत्सव "इन्द्रजात्रा" को जग बन्न पुग्यो। भुइँमा झरेको फूलहरू पूजामा चढाउन अयोग्य मानिन्छ ।तर यो यस्तो फूल हो जुन भुइँमा झरेपछी भगवानलाई पवित्र रूपमा चढाइन्छ।🙏🏻 #indrajatra #traveldiaries - @sir_mila