Alhamdulillah, sisi Ahlu-Zamaan tunaendelea na juhudi za dhati katika kubadilisha muonekano, hadhi na namna ya kuandaa matamasha ya Qasida nchini Tanzania. Dira yetu si kuimba Qasida kwa ajili ya burudani pekee, bali kuifanya Qasida kuwa njia ya kuelimisha, kukumbusha, kuunganisha jamii na kujenga imani za watu kupitia ujumbe wa dini na mapenzi kwa Mtume Muhammad ﷺ. Tunaamini kuwa Qasida ni sehemu muhimu ya urithi wetu wa Kiislamu, ambayo imebeba historia, mawaidha, adabu, mapenzi kwa Mtume ﷺ na mafundisho yenye thamani kubwa. Kwa sababu hiyo, tunajitahidi kuhakikisha kuwa matamasha ya Qasida yanapewa heshima na hadhi inayostahili. Katika juhudi hizi, Ahlu-Zamaan tunaendelea kuwekeza katika ubunifu wa majukwaa, ubora wa sauti na picha, maandalizi ya matukio, nidhamu ya wasanii na hadhira, pamoja na kuhuisha Qasida za wazee wetu waliotangulia mbele za haki, ili kizazi cha sasa na kijacho kiweze kuzifahamu na kunufaika nazo. Lengo letu ni kuona Qasida inafika kwa watu wengi zaidi, hasa vijana, na kuwafanya waone kuwa kuna njia nzuri ya kutumia vipaji vyao katika kumtaja Allah, kumswalia Mtume Muhammad ﷺ, kujifunza maadili mema na kueneza ujumbe wa upendo, umoja na mshikamano. Tunataka kujenga imani kupitia Qasida; kuufanya moyo usikilize, akili ifikiri na maisha yabadilike kwa wema. Kila hatua tunayopiga tunaiangalia kama sehemu ya safari kubwa ya kulinda na kuendeleza utamaduni wa Qasida Tanzania. Tunawaheshimu waliotutangulia, tunajifunza kutoka kwao na tunajitahidi kuendeleza yale mema waliyotuachia. Kwa Ahlu-Zamaan, hii si kazi ya siku moja. Ni dhamira inayohitaji upendo, nidhamu, mshikamano na kujitolea. Tunamuomba Allah atupe uwezo wa kuendelea na juhudi hizi kwa ikhlasi, azijaalie Qasida zetu ziwe sababu ya nyoyo kumkumbuka Allah, kumpenda Mtume Muhammad ﷺ na kuishi katika maadili mema. AHLU-ZAMAAN UPENDO • NIDHAMU. - @ahluzamaan_tanzania