LEQAL XƏBƏR məlumat verir ki, elm və təhsil nazirinin müavini Kənan Kərimzadə Milli Məclisin üç komitəsinin birgə iclasında 2027-ci il dövlət büdcəsi layihəsinin müzakirəsi zamanı müəllimlərin sertifikatlaşdırılması və əməkhaqlarındakı artımlarla bağlı məlumat verib. Nazir müavininin sözlərinə görə, sertifikatlaşdırmanın birinci mərhələsində iştirak edən 104 min müəllimdən 91 400 nəfərinin əməkhaqqına əlavə edilib. O bildirib ki, 60 min müəllim 30–51 bal aralığında nəticə göstərərək əməkhaqqına 10 faiz, təxminən 31 min müəllim isə 51 baldan yuxarı nəticə əldə edərək 35 faiz əlavə qazanıb. Kənan Kərimzadə qeyd edib ki, sertifikatlaşdırmada iştirak etməyən və ya prosesə cəlb olunmayan müəllimlərin orta aylıq əməkhaqqı 770 manatdır. Sertifikatlaşdırmadan keçərək 10 faiz əlavə alan müəllimlərin orta aylıq əməkhaqqı vergilər daxil olmaqla 1 010 manat, 35 faiz əlavə alanların isə 1 320 manat təşkil edir. Nazir müavini əlavə edib ki, bu islahatların davam etdirilməsi üçün 2027-ci ilin dövlət büdcəsindən 286,4 milyon manat vəsait ayrılması nəzərdə tutulub. Onun sözlərinə görə, 2014-cü illə müqayisədə müəllimlərin orta aylıq əməkhaqqı üç dəfədən çox artıb. 2026-cı ilin sentyabrına olan məlumata əsasən, ölkədə müəllimlərin orta aylıq əməkhaqqı vergilər daxil olmaqla 1 030 manat təşkil edib. #müəllim #əməkhaqqı #təhsil #xeber #legalxeber - @leqalxeber.az